يجي يوم
ونردّ لأهلنه

يجي يوم إنلمّ حزن الأيام
وثياب الصبر
ونرد لأهلنه

يجي يوم
الدرب يمشي بكيفه
وياخذنا لوطنّه

يجي يوم
أنفرّق الغربة على العالم ملبّس
والحزن طاسات حنّه

زغارنه يعرفون
ألهم ظهر بالدنيا
ومدينة وناس
وجيران وقرايبْ

ما يقللهم طفل: غربة عراقيين
ويموت اللعب بيهم
يا طفل الناس ما نعتب على اهلك
كلنا غربة
لكن احنه نشوف كل الحزن يحبيب حبايبْ

يجي يوم
زغارنا يعقدون خيط الشمس
بدرابين كل الناس
بلكي هناك حي الله طفل عن اهله غايبْ

تجي الدرابين
تاخذهم للبساتين
يلقطون التمر خستاوي ذايبْ

يجي ذاك اليوم
لكن انه خايف
قبل ذاك اليوم
تاكلني العقاربْ

يجي يوم
الفرح ياخذ كل مساحي الحزن
يحفر ساجية
ويسقي العمر
ونقله يا عمي فرح
راح الربيعْ

ظلت افطرة حزن كل يوم اخذها لمحطة
كم محطة كذب مرت ....
وشكثر سواق كذابين يا عمي فرح؟
لكن يخشون بعيونك يقولولك سريعْ

والله كطلة
واصعد ويّه الناس
هذا ال يشتري وذاك ال يبيعْ

كل بشر يوصل محطة
ويشبق اهله
وانا اشوبح من شبابيك الفراقين الحزينة

انطر احد ما يجيني
انطر ال دمعتها كانت
تاج يتلالى بجبيني

انطر انطر
وارجع ردود لمكاني
وينزل بقلبي الصقيعْ

السكك خلصت... ما وصلت
ومشيت وحدي بلايا سكة
ايه يا عشق الماله سكة
يا وطن
يا بيك وبليّاك اضيعْ

يجي يوم اركض
بالدرابين اتلعق بالشناشيل
ابوس البوب
واصيحن يجي يا بغدادْ

يجي الغربه ربّتلي علل
واسكت واقولن شحكي يحبيبه
الوقت قوادْ

اخذيني السواد اليل
اسمع طير يغرد على كيفه
اخذيني وحق عيناك
ما دنجت راسي
وبيّه طن عنادْ

يجي ذاك اليوم
وأن ماجاش
إدفنوني على حيلي
وقصتي لبغدادْ